گُدي   بي   كه ، روز  عيد   اِييـام

اِني     پاتِ  ،  به     مِنِ     تييام

خدا     دونه  ،  ريت     گلِ   ناره

گوش  و  گوشواره ، مه و آستاره

ز   داغ    تو  ،  دل    پرِ    درده

تو  دلت  بَرده ، رنگِ   مُو  زرده

تييَلِ  تو،  رنگِ    طاق   آسمونه

پَلَلِ    تو ،  چي   کمند  عاشقونه

كوگ  كهسار  رهدِنِ  تو ياد گِردِه

بلبل باغ،سي تو هردم،بيت ايخونه

بهار    اِوي ،  گل    به   بار   اِوي

ز   ويرُم   قول    و   قرار    اِويِ

خدا   دونه ، سي   تو    دل   تنگه

مو ، دلُم   شيشه ، تو ،  دلت سنگه

تنِت       مرمر  ،    بُرگَلِت     خنجر

پَلَلِت   ايگوي   ،   بندِ   شُو    رنگه

بيد   مجنون ،  سر اِنه  به  دُوْمَنِ  تو

پازنه    كُه   ،   مات    رَهرَهْدَنِ   تو

لاله  حيرون ،  گل  پريشون ، تا اِبينه

گَردِنِ  قو ،  كَي  اِیبو  چی  گَردِنِ  تو